సహజావబోధం

“దైవసంకల్పంతో ఐక్యానుసంధానం చెయ్యడమెలాగో తెలుసుకునేవరకు మానవజీవితం దుఃఖభూయిష్టంగానే ఉంటుంది; ఆయన నిర్ణయించిన ‘సరయిన దారి’ అహంభావ పూరితమైన తెలివిని తరచుగా గాభరా పెడుతూ ఉంటుంది,” [అని శ్రీయుక్తేశ్వర్ గారు అన్నారు] “దేవుడొక్కడే తప్పులేని సలహా ఇస్తాడు; ఆయన తప్ప మరెవ్వరు మొయ్యగలరు ఈ బ్రహ్మాండ భారాన్ని?”

ప్రతీ ఉదయమూ, రాత్రీ నిశ్శబ్దంలోకి, లేదా గాఢమైన ధ్యానంలోకి వెళ్ళండి, ఎందుకంటే సత్యానికి, పొరపాటుకు మధ్య భేదాన్ని తెలియచెప్పే విచక్షణ ధ్యానమే నేర్పుతుంది.

మీలోని దైవిక విచక్షణా శక్తి అయిన మీ అంతరాత్మ మార్గదర్శకత్వాన్ని అనుసరించడం నేర్చుకోండి.

మీ అంతరాత్మ దేవాలయంలో మీతో గుసగుసలాడే స్వరం ఈశ్వరుడు, ఆయనే సహజావబోధనా ప్రకాశం. మీరు పొరపాటు చేస్తుంటే మీకు తెలిసిపోతుంది; మీ మొత్తం అస్తిత్వం మీకు ఆ విషయం చెబుతుంది. ఆ భావనే ఈశ్వరుడి స్వరం. మీరాయనను వినకపోతే, ఆయన మౌనంగా ఉండిపోతాడు. కానీ మీరు మాయలోంచి మేలుకొని సరైనదే చేయాలనుకుంటే, ఆయన నడిపిస్తాడు.

సదా మీ అంతరాత్మ వాణిని అనుసరించడం వల్ల — అదే ఈశ్వరుడి వాణి — మీరు నిజమైన నీతిమంతుడు, అత్యధిక ఆధ్యాత్మికత నిండిన వ్యక్తి, శాంతియుత మానవుడు అవుతారు.

మనం కనుక పరమేశ్వరుణ్ణి ఎరిగి ఉంటే మనకు మన సమస్యలకే కాకుండా ప్రపంచాన్ని బాధపెడుతున్న సమస్యలకు కూడా జవాబు తెలుస్తుంది. మనమెందుకు జీవిస్తున్నాం, ఎందుకు మరణిస్తాం? జరిగేవి ఎందుకు జరుగుతున్నాయి, జరిగినవి ఎందుకు జరిగాయి? అందరి మానవుల అన్ని ప్రశ్నలకూ సమాధానాలిచ్చే ఒక ఋషి ఎవరైనా ఈ భూమి మీదకు ఎప్పుడైనా వస్తాడని నేననుకొను. కానీ ధ్యానం అనే ఆలయంలో మన హృదయాలను కలవరపెడుతున్న ప్రతీ జీవిత సమస్యకూ పరిష్కారం దొరుకుతుంది. దేవుడితో సంబంధమేర్పరచుకొన్నపుడు జీవితపు చిక్కుప్రశ్నలకు సమాధానం తెలుసుకొంటాము. కష్టాలకు పరిష్కారం కనుగొంటాము.