ಪ್ರಾರ್ಥನೆಯ ಶಕ್ತಿಯನ್ನು ಉಪಯೋಗಿಸುವುದು

ಈ ಹಿಂದೆ ನಿಮ್ಮ ಪ್ರಾರ್ಥನೆಗಳಿಗೆ ಉತ್ತರ ದೊರೆಯದೆ ನೀವು ನಿರಾಶರಾಗಿರಬಹುದು. ಆದರೆ ವಿಶ್ವಾಸವನ್ನು ಕಳೆದುಕೊಳ್ಳಬೇಡಿ…. ಭಗವಂತನು ಭಾವರಹಿತ ಮೂಕ ಜೀವಿಯಲ್ಲ. ಅವನು ಸಾಕ್ಷಾತ್ ಪ್ರೇಮವೇ ಆಗಿದ್ದಾನೆ. ಅವನನ್ನು ಸಂಪರ್ಕಿಸಲು ಧ್ಯಾನ ಮಾಡುವುದು ಹೇಗೆ ಎಂದು ತಿಳಿದರೆ, ಅವನು ನಿಮ್ಮ ಪ್ರೀತಿಪೂರ್ವಕ ಬೇಡಿಕೆಗಳಿಗೆ ಪ್ರತಿಕ್ರಿಯಿಸುತ್ತಾನೆ.

ಪ್ರಾರ್ಥನೆಯ ಮೊದಲನೆ ನಿಯಮವೆಂದರೆ, ನ್ಯಾಯಸಮ್ಮತ ಬಯಕೆಗಳೊಂದಿಗೆ ಮಾತ್ರ ದೇವರನ್ನು ಸಮೀಪಿಸುವುದು. ಎರಡನೆಯದು, ಅದು ಫಲಿಸಲು ಯಾಚಕನಂತಲ್ಲದೆ, ಮಗನಂತೆ ಕೋರುವುದು: “ನಾನು ನಿನ್ನ ಮಗು. ನೀನು ನನ್ನ ತಂದೆ. ನೀನು ಮತ್ತು ನಾನು ಒಂದೇ." ನೀವು ಆಳವಾಗಿ ಹಾಗೂ ಅವಿಚ್ಛಿನ್ನವಾಗಿ ಪ್ರಾರ್ಥಿಸಿದಾಗ ನಿಮ್ಮ ಹೃದಯದಲ್ಲಿ ಮಹದಾನಂದ ಉಕ್ಕೇರುವುದನ್ನು ಕಾಣುವಿರಿ. ಆ ಆನಂದ ಆವಿರ್ಭವಿಸುವವರೆಗೂ ಸಮಾಧಾನಗೊಳ್ಳದಿರಿ; ಏಕೆಂದರೆ ಆ ಸರ್ವ-ತೃಪ್ತಿಕಾರಕ ಆನಂದವು ನಿಮ್ಮ ಹೃದಯದಲ್ಲಿ ತುಂಬಿಬಂದಾಗ, ದೇವರು ನಿಮ್ಮ ಪ್ರಾರ್ಥನೆಯ ಪ್ರಸಾರಕ್ಕೆ ಶ್ರುತಿಗೊಂಡಿದ್ದಾನೆ ಎಂದು ನಿಮಗೆ ಅರಿವಾಗುತ್ತದೆ. ಆಗ ಭಗವಂತನಲ್ಲಿ ಪ್ರಾರ್ಥಿಸಿಕೊಳ್ಳಿ: "ಪ್ರಭುವೇ, ಇದು ನನ್ನ ಅವಶ್ಯಕತೆ. ಇದಕ್ಕೋಸ್ಕರ ಕೆಲಸ ಮಾಡಲು ನಾನು ಸಿದ್ಧ: ದಯವಿಟ್ಟು ನನಗೆ ಮಾರ್ಗದರ್ಶನ ನೀಡು ಮತ್ತು ಯಶಸ್ಸನ್ನು ದೊರಕಿಸುವ ಸೂಕ್ತ ಆಲೋಚನೆಗಳನ್ನು ಹೊಂದಲು ಹಾಗೂ ಸೂಕ್ತವಾದ ಕೆಲಸಗಳನ್ನು ಮಾಡಲು ನೆರವಾಗು. ನಾನು ನನ್ನ ವಿವೇಚನೆಯನ್ನು ಉಪಯೋಗಿಸುತ್ತೇನೆ, ಹಾಗೂ ದೃಢನಿಶ್ಚಯದಿಂದ ಕೆಲಸ ಮಾಡುತ್ತೇನೆ, ಆದರೆ ನೀನು ನನ್ನ ಬುದ್ಧಿಶಕ್ತಿ, ಇಚ್ಛಾಶಕ್ತಿ ಮತ್ತು ಕ್ರಿಯಾಶಕ್ತಿಯನ್ನು ನಾನು ಮಾಡಲೇಬೇಕಾದ ಆ ಸರಿಯಾದುದೆಡೆಗೆ ನಿರ್ದೇಶಿಸು.”

ನೀವು ಭಗವಂತನಲ್ಲಿ ಆತ್ಮೀಯತೆಯಿಂದ ಪ್ರಾರ್ಥಿಸಬೇಕು, ಅವನ ಮಗುವಿನಂತೆ, ಅದು ನೀವಾಗಿದ್ದೀರಿ. ನಿಮ್ಮ ಅಹಂನಿಂದ, ಅಪರಿಚಿತನಂತೆಯೋ ಅಥವಾ ಭಿಕ್ಷುಕನಂತೆಯೋ ಪ್ರಾರ್ಥಿಸಿದರೆ ಭಗವಂತನು ಬೇಡ ಎನ್ನುವುದಿಲ್ಲ, ಆದರೆ ಆ ಪ್ರಜ್ಞಾಭಾವವು ನಿಮ್ಮ ಪ್ರಯತ್ನಗಳನ್ನು ಸೀಮಿತಗೊಳಿಸುತ್ತದೆ. ಆತನ ಮಗುವಾಗಿ ನಿಮ್ಮ ಜನ್ಮಸಿದ್ಧ ಹಕ್ಕಾದ ನಿಮ್ಮದೇ ಇಚ್ಛಾಶಕ್ತಿಯನ್ನು ತ್ಯಜಿಸಬೇಕೆಂದು ಅವನು ಬಯಸುವುದಿಲ್ಲ.