ಆರೋಗ್ಯ ಮತ್ತು ಉಪಶಮನ

ಮೂರು ವಿಧದ ಕಾಯಿಲೆಗಳು ಇವೆ: ದೈಹಿಕ, ಮಾನಸಿಕ ಮತ್ತು ಆಧ್ಯಾತ್ಮಿಕ.

ದೈಹಿಕ ಕಾಯಿಲೆಯು ವಿಭಿನ್ನ ಬಗೆಯ ವಿಷಪೂರಿತ ಸ್ಥಿತಿಗಳು, ಸೋಂಕು ರೋಗಗಳು ಮತ್ತು ಅಪಘಾತಗಳಿಂದ ಉಂಟಾಗುತ್ತದೆ.

ಮಾನಸಿಕ ಕಾಯಿಲೆಯು ಭಯ, ಚಿಂತೆ, ಕೋಪ, ಮತ್ತು ಇತರ ಭಾವನಾತ್ಮಕ ಅಸಮತೋಲನಗಳಿಂದ ಉಂಟಾಗುತ್ತದೆ.

ದೇವರೊಂದಿಗಿನ ನೈಜ ಸಂಬಂಧದ ಬಗೆಗಿನ ಮನುಷ್ಯನ ಅಜ್ಞಾನದಿಂದಾಗಿ ಆತ್ಮದ ಕಾಯಿಲೆ ಉಂಟಾಗುತ್ತದೆ.

ಅಜ್ಞಾನವೇ ಪರಮ ವ್ಯಾಧಿ. ಯಾವಾಗ ವ್ಯಕ್ತಿಯು ಅಜ್ಞಾನವನ್ನು ದೂರ ಮಾಡುತ್ತಾನೋ, ಆಗ ಅವನು ದೈಹಿಕ, ಮಾನಸಿಕ ಮತ್ತು ಆಧ್ಯಾತ್ಮಿಕ ಕಾಯಿಲೆಯ ಎಲ್ಲಾ ಕಾರಣಗಳನ್ನು ಸಹ ದೂರ ಮಾಡುತ್ತಾನೆ. ನನ್ನ ಗುರು ಶ್ರೀ ಶ್ರೀ ಯುಕ್ತೇಶ್ವರರು ಯಾವಾಗಲೂ ಹೇಳುತ್ತಿದ್ದರು, “ಜ್ಞಾನವೇ ಶ್ರೇಷ್ಠವಾದ ಶುದ್ಧೀಕಾರಕ.”

ಭೌತಿಕ ಚಿಕಿತ್ಸೆಗಿರುವ ಸೀಮಿತ ಶಕ್ತಿಯಿಂದ ವಿವಿಧ ಬಗೆಯ ನೋವುಗಳನ್ನು ನಿವಾರಣೆ ಮಾಡಲು ಪ್ರಯತ್ನಿಸುವುದು ಬಹಳಷ್ಟು ಬಾರಿ ನಿರಾಶಾದಾಯಕವಾಗಿರುತ್ತದೆ. ಆಧ್ಯಾತ್ಮಿಕ ವಿಧಾನಗಳ ಅಸೀಮ ಶಕ್ತಿಯಲ್ಲಿ ಮಾತ್ರ ದೇಹ, ಮನಸ್ಸು ಮತ್ತು ಆತ್ಮದ “ಅಸ್ವಸ್ಥತೆ”ಗೆ ಮನುಷ್ಯ, ಶಾಶ್ವತ ಚಿಕಿತ್ಸೆಯನ್ನು ಕಂಡುಕೊಳ್ಳಬಹುದು. ಗುಣಪಡಿಸುವ ಆ ಅಸೀಮ ಶಕ್ತಿಯನ್ನು ದೇವರಲ್ಲಿ ಹುಡುಕಬೇಕು. ನೀವು ನಿಮ್ಮ ಪ್ರಿಯರನ್ನು ಕಳೆದುಕೊಂಡು ಮಾನಸಿಕವಾಗಿ ನರಳಿದ್ದರೆ, ನೀವು ಅವರನ್ನು ದೇವರಲ್ಲಿ ಮತ್ತೆ ಕಂಡುಕೊಳ್ಳಬಹುದು. ದೇವರ ಸಹಾಯದಿಂದ ಎಲ್ಲಾ ವಿಷಯಗಳೂ ಸಾಧ್ಯ. ಒಬ್ಬನು ದೇವರನ್ನು ನಿಜವಾಗಿ ಅರಿಯದ ಹೊರತು, ಕೇವಲ ಮನಸ್ಸಿಗೆ ಮಾತ್ರ ಅಸ್ತಿತ್ವವಿದೆ, ಆದ್ದರಿಂದ ಆರೋಗ್ಯ ನಿಯಮಗಳನ್ನು ಪಾಲಿಸುವ ಅಥವಾ ಯಾವುದೇ ದೈಹಿಕ ಚಿಕಿತ್ಸೆಗಳನ್ನು ಬಳಸುವ ಅಗತ್ಯವಿಲ್ಲ, ಎಂದು ಅವನು ಹೇಳುವುದು ಸಾಧುವಲ್ಲ. ನಿಜವಾದ ಸಾಕ್ಷಾತ್ಕಾರವಾಗುವವರೆಗೂ, ವ್ಯಕ್ತಿಯು ತನ್ನ ಎಲ್ಲಾ ಕಾರ್ಯಗಳಲ್ಲಿ ವಿವೇಚನೆಯನ್ನು ಬಳಸಬೇಕು. ಅದೇ ಸಮಯಕ್ಕೆ, ದೇವರನ್ನು ಶಂಕಿಸಬಾರದು, ಆದರೆ ದೇವರ ಸರ್ವವ್ಯಾಪಕ ದಿವ್ಯ ಶಕ್ತಿಯ ಮೇಲಿನ ತನ್ನ ವಿಶ್ವಾಸವನ್ನು ಸದಾ ದೃಢಪಡಿಸಬೇಕು.

ವೈದ್ಯರು ಕಾಯಿಲೆಯ ಕಾರಣಗಳನ್ನು ತಿಳಿಯಲು ಮತ್ತು ಆ ಕಾರಣಗಳನ್ನು ತೆಗೆದುಹಾಕಿ ಕಾಯಿಲೆಗಳು ಮತ್ತೆ ಬರದಂತೆ ತಡೆಯಲು ಪ್ರಯತ್ನಿಸುತ್ತಾರೆ. ವಿಶೇಷವಾದ ಚಿಕಿತ್ಸಾ ವಿಧಾನಗಳ ಬಳಕೆಯಲ್ಲಿ ವೈದ್ಯರು ಬಹಳ ಕುಶಲರಾಗಿದ್ದಾರೆ. ಆದರೂ, ಎಲ್ಲಾ ಕಾಯಿಲೆಗಳೂ ಔಷಧ ಮತ್ತು ಶಸ್ತ್ರಚಿಕಿತ್ಸೆಗೆ ಪ್ರತಿಕ್ರಿಯಿಸುವುದಿಲ್ಲ, ಮತ್ತು ಅದೇ ಈ ವಿಧಾನಗಳ ಮುಖ್ಯ ಕೊರತೆಯಾಗಿದೆ.

ರಾಸಾಯನಿಕಗಳು ಮತ್ತು ಔಷಧಗಳು ದೇಹದ ಜೀವಕೋಶಗಳ ಬಾಹ್ಯ ಭೌತಿಕ ಸಂಯೋಜನೆಯ ಮೇಲೆ ಮಾತ್ರ ಪರಿಣಾಮ ಬೀರುತ್ತವೆ, ಆದರೆ ಅವು ಜೀವಕೋಶಗಳ ಆಂತರಿಕ ಪರಮಾಣು ರಚನೆ ಅಥವಾ ಜೀವತತ್ವವನ್ನು ಬದಲಾಯಿಸುವುದಿಲ್ಲ. ಅನೇಕ ಸಂದರ್ಭಗಳಲ್ಲಿ, ದೇವರ ಗುಣಪಡಿಸುವ ಶಕ್ತಿ ದೇಹದಲ್ಲಿಯ “ಲೈಫ್‌ಟ್ರಾನ್ಸ್” ಅಥವಾ ಬುದ್ಧಿವಂತ ಪ್ರಾಣಶಕ್ತಿಯ ಅಸಮತೋಲನವನ್ನು ಒಳಗಿನಿಂದ ಸರಿಪಡಿಸುವವರೆಗೆ ವ್ಯಾಧಿಯನ್ನು ಗುಣಪಡಿಸಲು ಸಾಧ್ಯವಾಗುವುದಿಲ್ಲ.