పరమహంస యోగానందగారి “దేవుని వద్దకు చేర్చే శాస్త్రీయ రాజమార్గం”

అన్ని గొప్ప మతాల బోధనలు దేవుని వద్దకే చేరుస్తాయి; కానీ వారి వైవిధ్యభరితమైన బాహ్య ఆచారాలనే అడ్డదారులు అంతిమంగా సాధకుడిని ధ్యానం అనే ఒక ఆంతరిక రాజమార్గం వైపు తీసుకురావాలి.

శరీరం మరియు పరిమిత ప్రపంచం పై ఆలోచనల నుండి చైతన్యాన్ని ఉపసంహరించుకోవడం మరియు దానిని పరమాత్మలో విలీనం చేయడమే భగవంతుడిలో లీనం కాగల ముక్తి కి ఏకైక మార్గం. యేసు ధ్యానం చేశాడు. దేవుని వైపు అవసరమైన మొదటి అడుగులైన — నైతిక మరియు ఆధ్యాత్మిక సత్యాలను ఆయన ప్రజా బాహుళ్యానికి బోధించాడు; కానీ తన దగ్గరి శిష్యులకు మాత్రం ఆయన దేవునితో నిజమైన ఐక్యత పొందగల ధ్యానం అనే ఉన్నత శాస్త్రాన్ని బోధించాడు.

కేవలం ధ్యానం అనే ప్రక్రియ మాత్రమే మీకు స్వేచ్ఛను తెచ్చిపెట్టదు; మీ స్వభావం ధృఢంగా మరియు స్వచ్ఛంగా ఉండాలి. మీ మొత్తం జీవితం మరియు ప్రవర్తన సత్యం యొక్క నియమాలకు సామరస్యంగా ఉండాలి. యమం మరియు నియమం అనేవి యోగధ్యాన మార్గం యొక్క మొదటి నియమాలు — పది ఆజ్ఞలకు అనుగుణంగా మీరు చేయకూడని కొన్ని విషయాలు (“నువ్వు చంపకూడదు,” “నీవు తప్పుడు సాక్ష్యం చెప్పకూడదు,” “నీవు వ్యభిచారం చేయకూడదు” మరియు మొదలైనవి); మరియు మీరు అనుసరించాల్సిన సానుకూల సూచనలు: స్వచ్ఛత, సమచిత్తముతో కూడిన సంతృప్తి, ఆత్మపరిశీలన (స్వీయ-అధ్యయనం), భగవంతుని పట్ల భక్తి మరియు స్వీయ-క్రమశిక్షణ.

ధ్యానంలో పురోగతి సాధించాలంటే, మీరు గర్వం, కోపం, దురాశ, అసూయ నుండి విముక్తి పొందేందుకు కృషి చేయాలి. మీరు ప్రజలతో కపటంగా ఉండకూడదు; మీరు నిజాయితీగా భావించనిదాని గురించి మౌనం వహించండి. స్వార్థంతో ఇతరుల నుండి దేనినీ కోరవద్దు; మీరు ఏవీ ఆశించకపోతే, జనులు మీ నుండి ఏమి తీసుకోగలరు? దేవుడు తప్ప నాకు వేరే ఆశయం లేదు కాబట్టి, నన్ను ఎవరూ బాధించలేరు. నేను ఏ వ్యక్తిపైనా కోపాన్ని ప్రదర్శించాలనుకోను మరియు కోపాన్ని ప్రదర్శించడం ద్వారా నన్ను ఎవరూ రెచ్చగొట్టలేరు. కాబట్టి శాంతియుతంగా, స్వీయ-నియంత్రణతో మరియు నిజాయితీగా ఉండటానికి ప్రయత్నించండి. లేకపోతే, తప్పుడు ప్రవర్తన ధ్యానం యొక్క అనుకూల ప్రభావాలను నిరోధిస్తుంది.

మీరు ఆలోచించే ప్రతి ఆధ్యాత్మిక తలంపు మీ శాశ్వత స్నేహితునిగా ఉంటుంది. మరియు మీరు పొందుపర్చుకొనే ప్రతి చెడు భావన, చాలా చాలాకాలం పాటు మీ శత్రువుగా ఉంటుంది; నీవు దానిని వధించే వరకు అది నిన్ను వెంటాడుతూనే ఉంటుంది. దాన్ని గుర్తుంచుకోండి. దేవునికి దగ్గరయ్యేందుకు ఉపయోగపడే దశలవారీ పద్ధతులను నేను మీకు సూచిస్తున్నాను. మొదట, తప్పుడు ఆలోచనలు మరియు అలవాట్ల నుండి మిమ్మల్ని మీరు విడిపించుకోండి. రెండవది, మంచి అలవాట్లను ఏర్పరచుకోండి మరియు మంచి పనులు చేయండి.

ఆసనం లేదా భంగిమ మూడవ సోపానం అవుతుంది: గాఢంగా ధ్యానం చేయడానికి శరీరం మీ నియంత్రణలో ఉండాలి.

ఇప్పుడు ప్రాణాయామం (ప్రాణం లేదా ప్రాణశక్తి నియంత్రణ), శరీరం మరియు మనస్సు, శ్వాస మరియు హృదయ స్పందనలను శాంతపరిచే పద్ధతులు వస్తాయి. ప్రాణాయామం అనేది సాక్షాత్కారానికి సంబంధించిన ప్రాథమిక కళ. మీరు మర్త్య శ్వాసను జయించకపోతే మీరు భగవంతుడిని కనుగొనలేరు. శ్వాస మనస్సును ఇంద్రియస్థాయికి కట్టివేస్తుంది. మీ శ్వాస ప్రశాంతమైనప్పుడు, మీ మనస్సు అంతర్ముఖ మవుతుంది. శ్వాసరహిత స్థితే దేవుణ్ణి చేరే మార్గం. ప్రాణాయామం సాధన చేస్తే, ధ్యానం ఎలా చేయాలో మీకు తెలుస్తుంది — దేవుడిని ఎలా గ్రహించవచ్చో, ఆయనతో ఒక్కటై ఎలా ఉండవచ్చో తెలుస్తుంది.

ప్రాణాయామం ద్వారా వచ్చే మనస్సు యొక్క అంతర్ముఖ స్థితినే ప్రత్యాహారం అంటారు. అదే తదుపరి సోపానం: ఇంద్రియాలకు దూరంగా చైతన్యం అంతర్ముఖమై ఉంటుంది. అప్పుడు నిజమైన ధ్యానం ప్రారంభమవుతుంది.

శ్వాస, శరీరం మరియు బాహ్య అనుభూతుల నుండి మీ దృష్టి విముక్తమైనప్పుడు, అది భగవంతునిపైనే ఏకాగ్రంగా దృష్టిని కేంద్రీకరించగలదు. దాన్నే అష్టాంగ యోగ మార్గంలో ఆరవ సోపానమైన ధారణ, ఏకాగ్రత అంటారు. ఆంతరిక నిశ్చలత్వంలో, ఆత్మ యొక్క బ్రహ్మాండమైన స్వరాన్ని ఓం, శబ్దం లేదా ఆమెన్ రూపంలో వింటారు.

మీరు ఆ గొప్ప, సాంత్వన కలిగించే విశ్వ స్పందనను వింటూ మరియు దానిలో లీనమైనప్పుడు, మీ చైతన్యం అంతరిక్షమంతటా విస్తరిస్తుంది. అదే ధ్యానం, భగవంతుని అనంతత్వాన్ని గురించిన భావనపై ధ్యానం.

ధ్యానం యొక్క ఏకాగ్రత మరియు జ్ఞానం ఇంకా గాఢమైప్పుడు, ఒకవ్యక్తి అంతిమ స్థితి, సమాధి, చేరుకుంటారు, దీనిలో ధ్యానం చేసే వ్యక్తి, ధ్యాన ప్రక్రియ మరియు ధ్యానం యొక్క వస్తువు (దేవుడు) ఐక్యమవుతారు. సమాధిలో, ప్రత్యక్ష అనుభవం ద్వారా దేవుడు, మీరు ఒక్కటేనని మీరు తెలుసుకుంటారు.