ಪರಮಹಂಸ ಯೋಗಾನಂದರಿಂದ ಧ್ಯಾನ ಮತ್ತು ಕ್ರಿಯಾ ಯೋಗ

ಧ್ಯಾನವೆಂದರೆ, ಆತ್ಮವು ಅನಂತ ಚೇತನ ಅಥವಾ ಭಗವಂತನೊಂದಿಗೆ ಮತ್ತೆ ಐಕ್ಯವಾಗುವ ವಿಜ್ಞಾನವಾಗಿದೆ. ನಿಯತವಾಗಿ ಮತ್ತು ಆಳವಾಗಿ ಧ್ಯಾನ ಮಾಡುವ ಮೂಲಕ, ನಿಮ್ಮ ಆತ್ಮವನ್ನು ಅಂದರೆ ನಿಮ್ಮ ಅಸ್ತಿತ್ವದ ಅಂತರಾಳದಲ್ಲಿರುವ ಅಮರ, ಆನಂದದಾಯಕ ದಿವ್ಯ ಪ್ರಜ್ಞೆಯನ್ನು ನೀವು ಜಾಗೃತಗೊಳಿಸುವಿರಿ. ಯೋಗ ಧ್ಯಾನವು ನಮ್ಮ ಆತ್ಮದ ಅನಂತ ಸಾಮರ್ಥ್ಯವನ್ನು ಬಿಡುಗಡೆ ಮಾಡುವ ಕಾಲ-ಪರೀಕ್ಷಿತ ಮಾರ್ಗವಾಗಿದೆ. ಇದು ಆಲೋಚನೆ ಅಥವಾ ತಾತ್ವಿಕ ಚಿಂತನೆಯ ಅಸ್ಪಷ್ಟ ಮಾನಸಿಕ ಪ್ರಕ್ರಿಯೆಯಲ್ಲ. ಇದು ಜೀವನದ ಗೊಂದಲಗಳಿಂದ ಗಮನವನ್ನು ಮುಕ್ತಗೊಳಿಸುವ ನೇರ ಸಾಧನವಾಗಿದೆ, ನಮ್ಮ ನಿಜವಾದ ಆತ್ಮವನ್ನು, ಅಂದರೆ ನಿಜವಾಗಿಯೂ ಅದ್ಭುತ ದಿವ್ಯ ಅಸ್ತಿತ್ವವಾದ ನಮ್ಮನ್ನು, ಅರಿತುಕೊಳ್ಳುವುದರಿಂದ ನಮ್ಮನ್ನು ತಡೆಯುವ ಪ್ರಕ್ಷುಬ್ಧ ಮತ್ತು ಚಂಚಲ ಆಲೋಚನೆಗಳನ್ನು ಇದು ನಿಶ್ಚಲಗೊಳಿಸುತ್ತದೆ. ಧ್ಯಾನದ ಶಿಸ್ತಿನ ಮೂಲಕ, ನಾವು ಆಂತರ್ಯದಲ್ಲಿ ಕೇಂದ್ರೀಕರಿಸಲು ಕಲಿಯುತ್ತೇವೆ, ನಮ್ಮ ಅಚಲವಾದ ಶಾಂತಿ ಮತ್ತು ಆನಂದದ ಕೇಂದ್ರವನ್ನು ಕಂಡುಕೊಳ್ಳುತ್ತೇವೆ.

ನೀವು ಧ್ಯಾನದಲ್ಲಿ ಪ್ರಗತಿ ಹೊಂದುತ್ತಿದ್ದಂತೆ, ಕ್ರಮೇಣ ನೀವು ಆತ್ಮದಿಂದ ಬರುವ ಸದಾ ವೃದ್ಧಿಸುತ್ತಿರುವ ಆಂತರಿಕ ಶಾಂತಿ ಮತ್ತು ಸಂತೋಷವನ್ನು ಅನುಭವಿಸುತ್ತೀರಿ. ಅತ್ಯಂತ ಉನ್ನತ ಸ್ಥಿತಿಗಳಲ್ಲಿ, ನಿಮ್ಮ ಆತ್ಮವು ಭಗವಂತನೊಂದಿಗೆ ತನ್ನ ಸಂಪೂರ್ಣ ಏಕತೆಯನ್ನು ಕಂಡುಕೊಳ್ಳುತ್ತದೆ. ಇದೇ ಧ್ಯಾನದ ಗುರಿಯಾಗಿದೆ — ಭಾವಪರವಶತೆಯ, ಅತೀತಪ್ರಜ್ಞೆಯ, ಆನಂದದಾಯಕ ದಿವ್ಯ ಸಂಸರ್ಗ, ಇದನ್ನು ಸಮಾಧಿ ಎಂದು ಕರೆಯಲಾಗುತ್ತದೆ.

ಪರಮಹಂಸ ಯೋಗಾನಂದರು ಕ್ರಿಯಾ ಯೋಗ ವಿಜ್ಞಾನದ ಅಂಗವಾಗಿ ಶಕ್ತಿಯುತ ಧ್ಯಾನ ತಂತ್ರಗಳ ವ್ಯವಸ್ಥೆಯನ್ನು ಬೋಧಿಸಿದ್ದಾರೆ. ಈ ತಂತ್ರಗಳು ಯೋಗದಾ ಸತ್ಸಂಗ ಪಾಠಗಳ ಮೂಲಕ ಲಭ್ಯವಿರುತ್ತವೆ. ಧ್ಯಾನದ ಅತ್ಯುನ್ನತ ತಂತ್ರಗಳನ್ನು ಕಲಿಯಲು ಮತ್ತು ಪ್ರಯೋಜನ ಪಡೆಯಲು ಬಯಸುವ ಯಾರೇ ಆದರೂ ಈ ಪಾಠಗಳನ್ನು ಅಮೂಲ್ಯವಾದ ಸಾಧನ ಮತ್ತು ಜೀವಿತಾವಧಿಯ ಆಧಾರವೆಂದು ಪರಿಗಣಿಸುತ್ತಾರೆ.

ನೀವು ಯೋಗದಾ ಸತ್ಸಂಗ ಪಾಠಗಳಿಗೆ ಇನ್ನೂ ನೋಂದಾಯಿಸಿಕೊಂಡಿರದಿದ್ದರೆ, ಧ್ಯಾನ ಮಾಡುವುದು ಹೇಗೆ ಎಂಬ ಬಗ್ಗೆ ಕೆಲವು ಪ್ರಾಥಮಿಕ ಸೂಚನೆಗಳನ್ನು ಈ ಪುಟಗಳಲ್ಲಿ ಕಾಣಬಹುದು, ಧ್ಯಾನವು ತರುವ ಶಾಂತಿ ಮತ್ತು ದಿವ್ಯ ಪ್ರಜ್ಞೆಯನ್ನು ಅನುಭವಿಸಲು ನೀವು ಇದನ್ನು ಈಗಲೇ ಬಳಸಿಕೊಳ್ಳಬಹುದು.