ಭಕ್ತಿ ಗಾಯನದ ಶಕ್ತಿ

ಆತ್ಮ ಬಲದಿಂದ ಸಂಪೂರಿತವಾದ ಸಂಗೀತವು ಎಲ್ಲರ ಹೃದಯಗಳಿಗೆ ಅರ್ಥವಾಗುವಂತಹ ನಿಜವಾದ ಸಾರ್ವತ್ರಿಕ ಸಂಗೀತವಾಗಿದೆ. ಅಮೆರಿಕಾದ ಪ್ರೇಕ್ಷಕರ ಮುಂದೆ ಕಾಣಿಸಿಕೊಂಡ ವರ್ಷಗಳಲ್ಲಿ ನಾನು ಈ ಸತ್ಯದ ಅನೇಕ ನಿದರ್ಶನಗಳನ್ನು ಕಂಡಿದ್ದೇನೆ. ನಾನು ಏಪ್ರಿಲ್ 1926 ರಲ್ಲಿ ನ್ಯೂಯಾರ್ಕ್‌ನ ಕಾರ್ನೆಗೀ ಹಾಲ್‌ನಲ್ಲಿ ಉಪನ್ಯಾಸಗಳ ಸರಣಿಯನ್ನು ನೀಡುತ್ತಿದ್ದೆ ಮತ್ತು ಆ ಸಮಯದಲ್ಲಿ ನಾನು ಕೆಲವು ಸಂಗೀತ ಮಿತ್ರರಿಗೆ ಈ ಗೀತೆಗಳಲ್ಲಿ ಒಂದನ್ನು ಹಾಡುವ ಮತ್ತು ಹಿಂದಿನ ಪೂರ್ವಾಭ್ಯಾಸವಿಲ್ಲದೆ ಎಲ್ಲ ಶ್ರೋತೃಗಳನ್ನು ಅದರಲ್ಲಿ ಭಾಗವಹಿಸಲು ಕೇಳಿಕೊಳ್ಳುವ ಯೋಜನೆಯನ್ನು ಸೂಚಿಸಿದೆ. ಗಾಯನಗಳು ಅಮೇರಿಕನ್ನರ ತಿಳುವಳಿಕೆಗೆ ಹೊರತಾದದ್ದು ಎಂದು ನನ್ನ ಸ್ನೇಹಿತರು ಭಾವಿಸಿದರು.

ಸಂಗೀತವು ಭಗವಂತನೆಡೆಗಿರುವ ಆತ್ಮದ ಭಕ್ತಿಯ ವಿಶ್ವಭಾಷೆ ಹಾಗೂ ಪೌರ್ವಾತ್ಯ ಅಥವಾ ಪಾಶ್ಚಿಮಾತ್ಯ ಸಂಗೀತದ ಅರಿವಿರಲಿ, ಬಿಡಲಿ, ಎಲ್ಲ ಭಾವಪೂರ್ಣ ಜನರು ಹಾಡುವಾಗ ನನ್ನ ಹೃದಯದ ದಿವ್ಯ ಮೊರೆಯನ್ನು ಅರ್ಥಮಾಡಿಕೊಳ್ಳುತ್ತಾರೆ ಎಂದು ಆಕ್ಷೇಪಿಸಿದೆ.

ಒಂದು ಸಂಜೆ ನಾನು “ಓ ಗಾಡ್ ಬ್ಯೂಟಿಫುಲ್” ಹಾಡಲಾರಂಭಿಸಿದೆ ಹಾಗೂ ಈ ಹಾಡನ್ನು ಎಂದೂ ಕೇಳಿರದಿದ್ದ ಶ್ರೋತೃಗಳಿಗೆ ನನ್ನೊಡನೆ ಹಾಡಲು ಹೇಳಿದೆ. ಒಂದು ಗಂಟೆ ಇಪ್ಪತ್ತೈದು ನಿಮಿಷಗಳ ಕಾಲ ಇಡೀ ಶ್ರೋತೃವೃಂದದ ಸಾವಿರಾರು ಕಂಠಗಳು ಹರ್ಷಭರಿತ ಸ್ತುತಿಯ ದಿವ್ಯ ವಾತಾವರಣದಲ್ಲಿ “ಓ ಗಾಡ್ ಬ್ಯೂಟಿಫುಲ್” ಅನ್ನು ಹಾಡಿದವು.

ನಾನು ವೇದಿಕೆಯನ್ನು ಬಿಟ್ಟುಬಂದ ನಂತರವೂ ಪ್ರೇಕ್ಷಕರು ಆ ಹಾಡನ್ನು ಹಾಡುತ್ತಾ ಕುಳಿತಿದ್ದರು. ಮರುದಿನ ಅನೇಕ ಪುರುಷರು ಮತ್ತು ಮಹಿಳೆಯರು ಭಗವಂತನ ಅನುಭೂತಿಗೆ ಮತ್ತು ಪವಿತ್ರ ಪಠಣದ ಸಮಯದಲ್ಲಿ ಸಂಭವಿಸಿದ ಶರೀರ, ಮನಸ್ಸು ಮತ್ತು ಆತ್ಮದ ಉಪಶಮನಕ್ಕೆ ಸಾಕ್ಷಿಯಾದರು ಮತ್ತು ಇತರ ಸತ್ಸಂಗಗಳಲ್ಲಿ ಆ ಹಾಡನ್ನು ಪುನರಾವರ್ತಿಸಲು ಅನೇಕ ಕೋರಿಕೆಗಳು ಬಂದವು.

ಅಮೆರಿಕದ ಸಂಗೀತ ಮಂದಿರವಾದ ಮತ್ತು ಅನೇಕ ಶ್ರೇಷ್ಠ ಗಾಯಕರು ಮತ್ತು ಸಂಗೀತಗಾರರ ವಿಜಯೋತ್ಸವಗಳ ರಂಗವಾಗಿರುವ ಕಾರ್ನೆಗೀ ಹಾಲ್‌ನಲ್ಲಿನ ಈ ಅನುಭವವು, ಆತ್ಮ ಸಂಗೀತದ ಸಾರ್ವತ್ರಿಕ ಸ್ವರೂಪಕ್ಕೆ ಮತ್ತು ಪೂರ್ವದ ಭಕ್ತಿಗೀತೆಗಳ ಬಗ್ಗೆ ಪಾಶ್ಚಿಮಾತ್ಯರ ಅಶಿಕ್ಷಿತ ತಿಳುವಳಿಕೆಗೆ ಸಂದ ಸ್ವಯಂಪ್ರೇರಿತ ಗೌರವವಾಗಿದೆ.

ಆ ಸಂಜೆಯ ನಂತರ ನಾನು ಪಾಶ್ಚಾತ್ಯ ಮತ್ತು ಪೌರ್ವಾತ್ಯ ಶ್ರೋತೃಗಳೊಂದಿಗೆ ಸಾವಿರಾರು ಬಾರಿ ಈ ಕೀರ್ತನೆಗಳನ್ನು ಹಾಡಿದ್ದೇನೆ ಮತ್ತು ಭಗವಂತನ ದಿವ್ಯ ನಾಮವನ್ನು ಪ್ರೀತಿಯಿಂದ ಜಪಿಸುವ ಭಕ್ತರ ಮೇಲೆ ದಿವ್ಯ ಪ್ರಯೋಜನಗಳು ವೃಷ್ಟಿಯಾಗುವುದನ್ನು ನೋಡಿದ್ದೇನೆ.

ಲಾಸ್‌ ಏಂಜಲೀಸ್
ಡಿಸೆಂಬರ್‌ 4, 1938
ಪರಮಹಂಸ ಯೋಗಾನಂದರ ಪುಸ್ತಕ ವರ್ಡ್ಸ್‌ ಆಫ್‌ ಕಾಸ್ಮಿಕ್‌ ಚಾಂಟ್ಸ್ ನಿಂದ ಉದ್ಧರಿಸಲಾಗಿದೆ