ಆಧ್ಯಾತ್ಮಿಕ ಪರಂಪರೆ

ಈ ಮಹಾನುಭಾವರಲ್ಲಿ ಪ್ರತಿಯೊಬ್ಬರೂ ಯೋಗದಾ ಸತ್ಸಂಗ ಸೊಸೈಟಿ (ವೈಎಸ್ಎಸ್) ಆಫ್‌ ಇಂಡಿಯಾದ ಕ್ರಿಯಾ ಯೋಗದ ಆಧ್ಯಾತ್ಮಿಕ ವಿಜ್ಞಾನವನ್ನು ಆಧುನಿಕ ಜಗತ್ತಿಗೆ ಪರಿಚಯಿಸುವ ಕಾರ್ಯದಲ್ಲಿ ಪ್ರಮುಖ ಪಾತ್ರವನ್ನು ವಹಿಸಿದ್ದಾರೆ. (ಮತ್ತಷ್ಟು ಓದಲು ಛಾಯಾಚಿತ್ರಗಳನ್ನು ಕ್ಲಿಕ್ ಮಾಡಿ.)

ಕ್ರಿಯಾ ಯೋಗದಲ್ಲಿ ಪವಿತ್ರ ದೀಕ್ಷೆ ಪಡೆದ ಯೋಗದಾ ಸತ್ಸಂಗ ಸೊಸೈಟಿ ಆಫ್ ಇಂಡಿಯಾದ ಎಲ್ಲಾ ಸದಸ್ಯರು (ಸನ್ಯಾಸಿಗಳು ಮತ್ತು ಸಾಮಾನ್ಯ ಸದಸ್ಯರು) ಪರಮಹಂಸ ಯೋಗಾನಂದಜಿಯವರ ಶಿಷ್ಯರಾಗಿದ್ದಾರೆ. ಶಿಷ್ಯರು ಅವರನ್ನು ತಮ್ಮ ವೈಯುಕ್ತಿಕ ಗುರು ಎಂದು ಗೌರವಿಸಿ ಆರಾಧಿಸುತ್ತಾರೆ, ಅದೇ ರೀತಿ ಅವರ ಪರಂಪರೆಯ ಗುರುಗಳೂ ಸಹ ವೈ ಎಸ್ ಎಸ್ ನ ಶಿಷ್ಯರಿಗೆ ಪೂಜನೀಯರಾಗಿದ್ದಾರೆ. ಗುರು-ಶಿಷ್ಯ ಸಂಬಂಧದ ಬಗ್ಗೆ ಹೆಚ್ಚಿನ ಮಾಹಿತಿಯನ್ನು ಓದಿ.

ಗುರು-ಪರಂಪರೆ — ಗುರುವಿನ ಆಧ್ಯಾತ್ಮಿಕ ಅಧಿಕಾರದ ಹಸ್ತಾಂತರ

ಗುರುವಿನ ಪರಂಪರೆಯನ್ನು ಮುಂದುವರಿಸಲು ನೇಮಿತ ಶಿಷ್ಯನಿಗೆ ಗುರು ತಮ್ಮ ಆಧ್ಯಾತ್ಮಿಕ ಅಧಿಕಾರವನ್ನು ಹಸ್ತಾಂತರಿಸುವುದನ್ನು ಗುರು-ಪರಂಪರೆ ಎಂದು ಕರೆಯಲಾಗುತ್ತದೆ. ಈ ಪ್ರಕಾರ, ಪರಮಹಂಸ ಯೋಗಾನಂದರ ನೇರ ಗುರು ಪರಂಪರೆ ಎಂದರೆ, ಮಹಾವತಾರ ಬಾಬಾಜಿ, ಲಾಹಿರಿ ಮಹಾಶಯ ಮತ್ತು ಸ್ವಾಮಿ ಶ್ರೀ ಯುಕ್ತೇಶ್ವರ.

ಪರಮಹಂಸ ಯೋಗಾನಂದರು ತಮ್ಮ ನಿಧನಕ್ಕೂ ಮುನ್ನ, ತಾವು ವೈಎಸ್ಎಸ್ ಗುರುಗಳ ಸಾಲಿನಲ್ಲಿ ಕೊನೆಯವರಾಗಿರಬೇಕೆಂಬುದು ದೇವರ ಇಚ್ಛೆಯೆಂದು ಘೋಷಿಸಿದರು. ಅವರ ಸಂಸ್ಥೆಯಲ್ಲಿ ನಂತರದ ಯಾವುದೇ ಶಿಷ್ಯರಾಗಲಿ ಅಥವಾ ಮುಖ್ಯಸ್ಥರಾಗಲಿ ಎಂದಿಗೂ ಗುರುವಿನ ಉಪಾಧಿಯನ್ನು ಹೊಂದುವುದಿಲ್ಲ. (ಈ ದೈವಿಕ ಶಾಸನವು ಧಾರ್ಮಿಕ ಇತಿಹಾಸದಲ್ಲಿ ಅನನ್ಯವೇನಲ್ಲ. ಸಿಖ್ ಧರ್ಮವನ್ನು ಸ್ಥಾಪಿಸಿದ ಮಹಾನ್ ಸಂತ ಗುರು ನಾನಕ್ ಅವರ ನಿಧನದ ನಂತರ, ಗುರುಗಳ ಸಾಲು ಸಹಜವಾಗಿಯೇ ಮುಂದುವರಿಯಿತು. ಆ ಸಾಲಿನಲ್ಲಿ ಹತ್ತನೆಯ ಗುರು ತಾವು ಆ ಸಾಲಿನಲ್ಲಿ ಕೊನೆಯವರು ಎಂದು ಘೋಷಿಸಿದರು, ಆಮೇಲೆ ಬೋಧನೆಗಳನ್ನೇ ಗುರು ಎಂದು ಪರಿಗಣಿಸಲಾಯಿತು.)

ಪರಮಹಂಸಜಿಯವರು ತಮ್ಮ ನಿಧನದ ನಂತರ, ಅವರು ಸ್ಥಾಪಿಸಿದ ಯೋಗದಾ ಸತ್ಸಂಗ ಸೊಸೈಟಿ ಆಫ್ ಇಂಡಿಯಾ/ಸೆಲ್ಫ್-ರಿಯಲೈಝೇಷನ್ ಫೆಲೋಶಿಪ್ ಮೂಲಕ ತಮ್ಮ ಕೆಲಸವನ್ನು ಮುಂದುವರಿಸುವುದಾಗಿ ಭರವಸೆ ನೀಡಿದ್ದರು. ಅವರು ಹೀಗೆ ಹೇಳಿದರು, “ನಾನು ಹೋದ ಮೇಲೆ ಬೋಧನೆಗಳು ಗುರುವಾಗುತ್ತವೆ….ಬೋಧನೆಗಳ ಮೂಲಕ ನೀವು ನನ್ನೊಂದಿಗೆ ಮತ್ತು ನನ್ನನ್ನು ಕಳುಹಿಸಿದ ಮಹಾನ್ ಗುರುಗಳೊಂದಿಗೆ ಶ್ರುತಿಗೊಂಡಿರುತ್ತೀರಿ.”

ವೈ ಎಸ್ ಎಸ್/ಎಸ್ ಆರ್ ಎಫ್ ನ ನಾಯಕತ್ವದ ಉತ್ತರಾಧಿಕಾರಿಯ ಬಗ್ಗೆ ಕೇಳಿದಾಗ, ಅವರು ಹೀಗೆ ಉತ್ತರಿಸಿದರು, “ಆತ್ಮಸಾಕ್ಷಾತ್ಕಾರ ಹೊಂದಿರುವ ಪುರುಷರು ಮತ್ತು ಮಹಿಳೆಯರು ಯಾವಾಗಲೂ ಈ ಸಂಸ್ಥೆಯ ಮುಖ್ಯಸ್ಥರಾಗಿರುತ್ತಾರೆ. ಅವರು ಈಗಾಗಲೇ ದೇವರು ಮತ್ತು ಗುರುಗಳಿಗೆ ಪರಿಚಿತರಾಗಿದ್ದಾರೆ. ಅವರು ಎಲ್ಲಾ ಆಧ್ಯಾತ್ಮಿಕ ಮತ್ತು ಸಾಂಸ್ಥಿಕ ವ್ಯವಹಾರಗಳಲ್ಲಿ ನನ್ನ ಆಧ್ಯಾತ್ಮಿಕ ಉತ್ತರಾಧಿಕಾರಿ ಮತ್ತು ಪ್ರತಿನಿಧಿಯಾಗಿ ಸೇವೆ ಸಲ್ಲಿಸುತ್ತಾರೆ.”