யோகம் என்பதன் உண்மையான அர்த்தம்

YSS/SRF இன் தலைவரும் ஆன்மீக முதல்வருமான சுவாமி சிதானந்த கிரி, 2017 இல் இந்தியாவில் உரையாற்றும்போது கூறினார்: “ஆயிரக்கணக்கான ஆண்டுகளாக இந்தியா அனைத்து மனிதகுலத்திற்கும் மிக உயர்ந்த ஆன்மீக சத்தியத்தின் பாதுகாவலனாக இருந்து வருகிறது. இந்தியாவின் சிறந்ததை முதலில் மேற்கத்திய நாடுகளுக்கும், பின்னர் உலகிற்கும், மற்றும் தனது பிரியமான இந்தியாவுக்கும் திரும்பக் கொண்டுவருவது பரமஹம்ஸரின் சிறப்புப் பணியாக இருந்தது. இந்தியாவின் மேன்மை மிகு நாகரிகத்தின் உயர்ந்த பொற்கால யுகத்திலிருந்து, இந்தியாவின் உலகளாவிய ஆன்மீகத்தின் சாராம்சத்தை அதன் தூய வடிவத்தில் கொண்டு வந்தார். அதுதான் யோகம். இது ஒரு விஞ்ஞானமே தவிர, ஒரு மதம் அல்லது மதத்தின் ஒரு பிரிவு அல்ல; இதன் காரணமாக, இந்த ஆன்மீக சேவை — யோகத்தின் ஒளி — மனிதகுலம் முழுவதற்குமான ஒரு ஆன்மீக அருளாசியாக உண்மையிலேயே உலகளாவியதாக இருக்க முடியும்.”

பரமஹம்ஸ யோகானந்தர் யோகப் பயிற்சி செய்வதற்கும் அதன் உன்னத பலன்களைப் அடைவதற்கும் எந்தவொரு குறிப்பிட்ட தேசியம், இனம் அல்லது சமயமாக இருக்க வேண்டிய அவசியமில்லை என்று அடிக்கடி சுட்டிக்காட்டினார். ஒரு விஞ்ஞானமாக அதன் உண்மையான உலகளாவிய தன்மை அதன் விளைவுகளை எந்தவொரு நாட்டிலிருந்தும், கிழக்கோ அல்லது மேற்கோ எவரும் பெற முடியும் என்பதில் உள்ளது.

யோக தியானத்தின் தொடர்ச்சியான பயிற்சி மூலம், நாம் அனைவரும் ஆனந்தம், அன்பு, கருணை, அமைதியை ஆழமாக உணர முடியும். இந்த மாற்றங்கள் நமக்குள் நிகழும்போது, அவற்றின் தாக்கம் வெளிப்புறமாக, கண்ணுக்குத் தெரியாத ஒரு விதிமுறை மூலம், முதலில் நமது உடனடி குடும்பத்திற்கும் சமூகத்திற்கும் பின்னர் உலகத்திற்கும் பரவுகிறது. பரமஹம்ஸர் கூறியது போல், “உங்களை சீர்திருத்திக் கொண்டால், பல்லாயிரம் பேரை நீங்கள் சீர்திருத்துவீர்கள்”.

யோகத்தின் ஒரு பெரிய நன்மை என்னவென்றால், தியானம் செய்பவருக்கு அனைத்து மனிதகுலத்துடனும் ஒருமை உணர்வு உருவாகிறது. ஒருவரின் ஆன்மீக நம்பிக்கைகள் அல்லது நம்பிக்கையற்ற தன்மை எதுவாக இருந்தாலும், யோக விஞ்ஞானத்தைப் பயிற்சி செய்யும் எவரும் இறுதியில் தெய்வீகம் அனைத்திலும் மற்றும் அனைவரிடத்திலும் இருப்பதை உணருவார்.

இத்தகைய உலகளாவிய தன்மை கொண்ட இதயங்களும், மனங்களும், தற்பொழுது, உலகம் தொழில்நுட்ப முன்னேற்றங்களின் விளைவாக அதிவேகமாக சுருங்கி, நம் அனைவரையும் மிகவும் நெருக்கமாக வைத்திருக்கும் இந்த கால கட்டத்தின் மிகப்பெரிய தேவையாகும். 1951 ஆம் ஆண்டு ஒரு நேர்காணலின் போது, பரமஹம்ஸர் உலகத்திற்கு தனது செய்தியை சுருக்கமாகக் கூறும்படி கேட்டுக் கொள்ளப்பட்டார். மனிதகுலம் அதன் இன்றியமையாத ஒற்றுமையை உணர்ந்து கொள்வதற்கான அடிப்படைத் தேவையைப் பற்றி அவர் பேசினார்—தீர்க்கதரிசன வார்த்தைகள் சொல்லப் போனால் அவர் அவற்றை முதன்முதலில் கூறியபோது இருந்ததை விட தற்போது இன்றியமையாதவையாக இருக்கிறது:

“என் உலக சகோதர சகோதரிகளே: இறைவன் தான் நம் தெய்வத் தந்தை மேலும் அவன் ஒருவனே. நாம் அனைவரும் அவனது குழந்தைகள், மற்றும் இந்த முறையில் உலக ஐக்கிய நாடுகளின் தேக, மன பொருளாதார மற்றும் ஆன்மீக ரீதியான சீரிய குடிமக்களாக மாறுவதற்காக ஒருவருக்கொருவர் உதவி புரிந்து கொள்வதற்கு ஆக்கபூர்வமான வழிகளை நாம் பின்பற்ற வேண்டும். ஆயிரம் மனிதர்கள் உள்ள ஒரு சமூகத்தில் ஒவ்வொரு தனிநபரும் தன்னை வளப்படுத்திக் கொள்வதற்காக மற்றவர்களோடு ஆதாய இழப்பில், லஞ்சம், சண்டை மற்றும் சூழ்ச்சி வாயிலாக முயன்றால், ஒவ்வொரு நபரும் தொள்ளாயிரத்து தொண்ணூற்று ஒன்பது எதிரிகளை பெற்றிருப்பார்; ஆனால், ஒவ்வொரு நபரும் மற்றவர்களுடன் ஒத்துழைத்தால்-தேக, மன, பொருளாதார, ஆன்மீகரீதியாக-ஒவ்வொருவரும் தொள்ளாயிரத்து தொண்ணூற்று ஒன்பது நண்பர்களைப் பெற்றிருப்பர். அனைத்து நாடுகளும் ஒருவருக்கொருவர் அன்பின் மூலம் உதவி புரிந்து கொண்டால், இந்த பூமி முழுவதும் அனைவரது நன்மையை மேம்படுத்துவதற்கான அதிக வாய்ப்புகளுடன் அமைதியில் வாழும்….

முன்பு எப்போதுமில்லாதவாறு வானொலி, தொலைக்காட்சி, விமானப்பயணம் போன்ற சாதனங்கள் நம் அனைவரையும் ஒன்று சேர்த்துள்ளன. ஆசியா ஆசியர்களுக்கு மட்டும், ஐரோப்பா ஐரோப்பியர்களுக்கு மட்டும், அமெரிக்கா, அமெரிக்கர்களுக்கு மட்டும் மற்றும் இவ்வாறாக, என்று இனிமேல் இருக்க முடியாது; ஆனால் இறைவனின் கீழ் உலகம் ஒரு ஐக்கிய நாடாக இருந்தால் ஒவ்வொரு மனிதனும் தேக, மன மற்றும் ஆன்ம நிறைவிற்கான ஒவ்வொரு வாய்ப்புடனும் ஒரு லட்சிய குடிமகனாக திகழுலாம் என நாம் கற்க வேண்டும்.

“அதுதான் உலகத்திற்கான எனது செய்தி, எனது வேண்டுகோள்.”

உடல், மன மற்றும் ஆன்ம ரீதியில் சிறந்த குடிமக்களாக உருவாவதற்கான பரஸ்பர உதவிக்கு ஆழ்ந்த தாக்கம் ஏற்படுத்தும் “ஆக்கபூர்வமான வழிமுறைகளை” உலகளாவிய யோக விஞ்ஞானத்தில் காணலாம்.